O proxecto

Introdución

Benvidos a “O tempo desde o Sarmiento”. Este é un proxecto levado a cabo por alumnos e profesores do IES Frei Martín Sarmiento, de Pontevedra, que se enmarca dentro do programa Meteoescolas, promovido dende a Consellería de Cultura, Educación e Ordenación Universitaria e dende Meteogalicia.

A nosa andaina comezou coa entrega e instalación de dous instrumentos de medición que presenta calquera caseta meteorolóxica: un termómetro de temperaturas máxima e mínima e un pluviómetro. A partir de ahí comezamos a realizar variedade de actividades desde distintas materias (ciencias, linguas, debuxo, tecnoloxía) sempre relacionadas co clima. Esta páxina pretende reflectir o traballo realizado ao longo do curso polos nosos alumnos coa axuda do profesorado. Invítovos a coñecer a nosa experiencia.


Obxectivos

• Coñecer os elementos, funcionamento e características dunha estación meteorolóxica.
• Achegar e familiarizar aos alumnos/as coas rutinas e métodos a seguir no traballo científico.
• Destacar a importancia da rigorosidade na toma de datos e no método de traballo.
• Analizar os datos meteorolóxicos utilizando ferramentas axeitadas.
• Elaborar conclusións relacionando os datos obtidos coa observación do entorno natural e coas predicións meteorolóxicas.
• Coñecer mellor o clima no que nos atopamos e os principais factores que o determinan.
• Concienciar aos alumnos/as sobre a utilidade de estudar o medio natural e, en concreto, o clima.
• Reflexionar sobre as consecuencias da contaminación atmosférica e a necesidade de coidar o medio ambiente.
• Potenciar a creatividade.